5 noyabr 2026-cı il tarixində Naxçıvan Dövlət Universitetinin nəzdində Naxçıvan Tibb Kollecində 8 Noyabr – Zəfər Gününə həsr olunmuş “Zəfərə gedən yol” adlı tədbir keçirilib.
Tədbir Azərbaycan xalqının Ümummilli Lideri Heydər Əliyevin və Azərbaycanın suverenliyi, ərazi bütövlüyü uğrunda canlarından keçərək şəhidlik zirvəsinə ucalmış qəhrəmanlarımızın əziz xatirəsinin bir dəqiqəlik sükutla yad edilməsi ilə başlayıb.
Tədbiri giriş sözü ilə kollecin direktor vəzifələrini müvəqqəti icra edən Səidə Şahverdiyeva açaraq Zəfər Gününün tarixi əhəmiyyətindən, xalqımızın Vətən müharibəsində nümayiş etdirdiyi birlik və həmrəylikdən, Azərbaycan Ordusunun qəhrəmanlığından bəhs edib.
Daha sonra tədbirdə iştirak edən şəhid anaları, şəhid ailələrinin üzvləri və qazilər çıxış edərək Vətən müharibəsində yaşadıqları xatirələri bölüşüb, şəhidlərimizin qəhrəmanlıq yolundan və Zəfərin xalqımıza yaşatdığı qürur hissindən danışıblar.
Tədbir çərçivəsində İkinci Qarabağ müharibəsinin tarixi anlarını və qəhrəmanlıq salnaməsini əks etdirən videoçarx nümayiş olunub. Kollecin tələbələrinin ifasında Vətənə, qəhrəmanlığa və Zəfərə həsr olunmuş şeirlər səsləndirilib, musiqi nömrələri təqdim edilib.
Vətən sevgisinin, milli birliyin və qəhrəmanlıq ruhunun tərənnüm olunduğu tədbir iştirakçılarda böyük qürur və duyğusal anlar yaşadıb.